Грамадзянін Беларусі ў стане алкагольнага ап’янення, на якім не было ніякага адзення, акрамя майткоў, зладзіў п’яны дэбош у гатэлі ў раёне Каран-Біч на тайландскім турыстычным востраве Пхукет, а потым напаў на паліцэйскіх, якія прыбылі на выклік гатэльнага персаналу, і пасля доўгага супраціву быў дастаўлены ў паліцэйскі ўчастак, паведаміла газета Bangkok Post.
«Паліцэйскія прыбылі ў адзін з гатэляў раёна Каран-Біч у 03.10 у сераду на выклік персаналу гатэля і знайшлі замежніка ў стане моцнага ап’янення, што парушаў грамадскі парадак і быў адзнты толькі ў майткі, а пазней быў ідэнтыфікаваны як 39-гадовы грамадзянін Беларусі. Мужчына зладзіў бойку з паліцэйскімі і гатэльнай аховай і цаной значных намаганняў з боку паліцыі быў затрыманы», — гаворыцца ў паведамленні газеты.
Уся сцэна ў гатэлі была знятая на відэа адным з пастаяльцаў і выкладзеная ў інтэрнэт. На відэа мужчына ў майтках раскідвае паліцэйскіх і гатэльную ахову па двары гатэля, а яго жонка і трое дзяцей спрабуюць яго супакоіць.
Выданне назвала імя затрыманага — Сяргей Асычук.
Мужчыну выстаўленыя абвінавачанні ў парушэнні грамадскага парадку і нападзе на супрацоўнікаў паліцыі падчас выканання імі службовых абавязкаў. Паводле тайландскага заканадаўства па другім абвінавачанні яму можа пагражаць штраф у памеры да пяці тысяч даляраў і/або турэмнае зняволенне тэрмінам ад двух гадоў да пажыццёвага ў залежнасці ад цяжкасці траўмаў, атрыманых супрацоўнікамі паліцыі.
Беларус адпачываў на Пхукеце разам з жонкай і трыма няпоўнагадовымі дзецьмі і мусіў вылецець на радзіму ў сераду. Сям’я затрыманага наведала яго ў паліцэйскім участку, а пазней у сераду вылецела ў Беларусь, як было запланавана. Сам мужчына застаўся ў камеры часовага ўтрымання ў паліцэйскім участку на Пхукеце, каб найбліжэйшым часам паўстаць перад судом.