Выступ беларускага коміка Славы Камісаранкі ў Брне скончыўся ў прызначаны час. Пра гэта са спасылкай на заяву мясцовай паліцыі паведамляе iDNES.cz.
Паводле звестак выдання, 17 лістапада пасля выступу Камісаранкі ў клубе Sono ў паліцыю паступіла паведамленне пра бомбу.
«Выступ коміка не скончыўся раней. Ён скончыўся своечасова — згодна з раскладам клуба, дзе праходзіў», — расказала прадстаўніца паліцыі.
Паводле яе, выбуховай прылады не знайшлі, але інфармацыя пра інцыдэнт была перададзеная калегам у Карлавы Вары, дзе Камісаранка мусіў выступаць на наступны дзень, каб тыя ўзмацнілі меры бяспекі.
Нагадаем, раней блогер Кірыл Карупаеў, які прысутнічаў на мерапрыемстве, заявіў, што 17 лістапада ў чэшскім Брне быў сарваны канцэрт беларускага коміка Славы Камісаранкі. Паводле яго, канцэрт доўжыўся каля гадзіны, а потым хтосьці паклікаў коміка за сцэну.
«Вяртаецца (Камісаранка. — Заўв. рэд.), кажа раптам, што ў нас з вамі дзве хвіліны. Перапыняе папярэднюю гісторыю і расказвае кароткі жарт на дзве хвіліны. Пасля гэтага завяршаецца канцэрт, усе сыходзяць, і сек’юрыці пачынаюць хуценька ўсіх расчышчаць», — расказаў блогер.